„ოცნების ქალაქის“ მშენებლობის მეორე ეტაპი იწყება

„ოცნების ქალაქის“ მშენებლობის მეორე ეტაპი იწყება, - მშენებლობის საფუძვლის ჩაყრასთან დაკავშირებით სიმბოლური კაფსულის ჩაგდების ღონისძიებაში საქართველოს პრემიერ-მინისტრმა ირაკლი კობახიძემ აჭარის ავტონომიური რესპუბლიკის მთავრობის თავმჯდომარე თორნიკე რიჟვაძესთან ერთად მიიღო მონაწილეობა.

მთავრობის მეთაურმა ხაზი გაუსვა პროექტის განსაკუთრებულ მნიშვნელობას და აღნიშნა, რომ ის ადასტურებს, თუ რამდენად პრიორიტეტულია ხელისუფლებისთვის მოქალაქეების კეთილდღეობა.

ირაკლი კობახიძის შეფასებით, ,,ოცნების ქალაქის" მშენებლობა მთავრობის  სოციალური პოლიტიკის ერთ-ერთი გამორჩეული მიღწევა და უპრეცედენტო სოციალური პროექტია.

,,პირველი ეტაპი წარმატებით დასრულდა, აშენდა სამი 12-სართულიანი კორპუსი, სადაც უკვე 582 ოჯახი დაბინავდა, 800-მდე ბავშვს მიეცა შესაძლებლობა, გაიზარდოს ჯანსაღ და კომფორტულ გარემოში. დღეს ვიწყებთ ამ პროექტის მეორე ეტაპს, რომელიც კიდევ უფრო მასშტაბური და ამბიციურია. ახალი გეგმის მიხედვით, 19 407 კვადრატულ მეტრ ფართობზე აშენდება 9 მრავალბინიანი საცხოვრებელი სახლი, რომლებშიც 1077 ოჯახი მიიღებს ბინას. ახალი ბინები სრულად იქნება აღჭურვილი გაზმომარაგების, წყლის, წყალარინების ინფრასტრუქტურით და ყველა საჭირო მომსახურება იქნება უზრუნველყოფილი“, - განაცხადა პრემიერმა.

მთავრობის მეთაურის თქმით, „ოცნების ქალაქის“ პროექტი არ არის მხოლოდ საცხოვრებელი კორპუსები, მოქალაქეებს სჭირდებათ სრულფასოვანი საცხოვრებელი გარემო და ამიტომ ახალ ეტაპზე ასევე იგეგმება სკოლის, საბავშვო ბაღის, რეკრეაციული ზონების და სხვა ინფრასტრუქტურული ობიექტების მშენებლობა.

,,ეს პროექტი ასევე ბათუმის განვითარებაში შეიტანს ძალიან მნიშვნელოვან წვლილს, გაჩნდება ახალი საცხოვრებელი ფართები, სკოლა, ბაღი და სხვა ობიექტები. ეს ყველაფერი ხელს შეუწყობს ქალაქის ინფრასტრუქტურის გაუმჯობესებას და, რა თქმა უნდა, საბოლოო ჯამში ქალაქის ეკონომიკის განვითარებას, ახალი სამუშაო ადგილების შექმნას”, - აღნიშნა ირაკლი კობახიძემ.

პრემიერ-მინისტრმა მადლობა გადაუხადა აჭარის ავტონომიური რესპუბლიკის ხელისუფლებას და ყველას, ვინც ჩართული იყო პროექტის პირველი ფაზის წარმატებით განხორციელებაში - პროექტის ავტორებსა და არქიტექტორებს, მშენებლებს, ინჟინრებს და ტექნიკურ პერსონალს. 

,,ოცნების ქალაქის” მშენებლობის მეორე ეტაპი 2028 წელს დასრულდება.