აჭარის მთავრობის სხდომა

დღეს გამართულ აჭარის მთავრობის სხდომაზე მთავრობის თავმჯდომარე თორნიკე რიჟვაძემ გაზრდილი ბიუჯეტის ფარგლებში რეგიონში დაგეგმილი და მიმდინარე პროექტები განიხილა და აღნიშნა, რომ ყველა პროექტი გათვლილია აჭარის თითოეული მცხოვრებლის საჭიროებებზე, მათ კეთილდღეობაზე და 26 ოქტომბრის არჩევნების შემდეგ ახალი შემართებით გაგრძელდება პროექტების განხორციელება. 

 

მთავრობის თავმჯდომარემ რეგიონში წინასაარჩევნო გარემო შეაფასა. აღნიშნა, რომ  რეგიონში არის სამართლიანი და გამჭვირვალე საარჩევნო გარემო, რასაც საერთაშორისო სადამკვირვებლო მისიებიც იზიარებენ, ხოლო ოპოზიციური რადიკალური ძალების მხრიდან ექსცესები შეიცავს კრიმინალურ ნიშნებს და ამას შესაბამისი კვალიფიკაცია უნდა მიეცეს.

 

თორნიკე რიჟვაძის განცხადებით მხოლოდ ბიზნესის თავისუფლების, მშვიდობის პირობებში შესაძლებელია ორნიშნა ეკონომიკური ზრდის მიღწევა და უკვე მეორე წელია აჭარის რეგიონში და მთლიანად ქვეყანაში ზრდა არის ერთ-ერთი მოწინავე როგორც ევროპაში, ასევე მთელ მსოფლიოში. 

 

აჭარის რესპუბლიკური ბიუჯეტი 85 400 000 ლარით გაიზარდა და 850 100 000 ლარს შეადგენს. გაზრდილი ბიუჯეტის ფარგლებში უკვე გამოცხადდა ტენდერი სხვადასხვა მიმართულებით მნიშვნელოვანი პროგრამების განხორციელებაზე.  მათ შორის, ხელვაჩაურის მუნიციპალიტეტში FIFA-ს სტანდარტის, 450 მაყურებელზე გათვლილი ,,მაჭახელას“ საფეხბურთო სტადიონის, დაბა ხულოს სპორტული სკოლის და საფეხბურთო სტადიონის მოწყობის სამუშაოებზე,  დაბა ქედაში, "საფეხბურთო კლუბ ბეთლემის" სტადიონის სამშენებლო სამუშაოებზე. გამოცხადდა ტენდერი ქობულეთში, კიდევ ერთი, ახალი 1.4 კილომეტრიანი  ზღვისპირა პარკის მოწყობის სამუშაოებზე.  ასევე დაიწყება ქობულეთის ეკომიგრანტების საცხოვრებელი კორპუსის მშენებლობა. დაფინანსდება მაღალმთიანი აჭარის გაზიფიცირების და წყლის სისტემის განვითარების პროექტები.  განხორციელდება მთის კურორტებისა და სარეკრეაციო ადგილების განვითარების ხელშემწყობი პროექტები.

 

იზრდება როგორც კაპიტალური, ასევე სპეციალური ტრანსფერები ყველა მუნიციპალიტეტთან მიმართებაში. ბიუჯეტის ზრდის ფარგლებში, აჭარაში ყველა საჯარო მოხელეს, როგორც საშტატო განრიგის, ასევე შტატგარეშე მოსამსახურეებს, როგორც ცენტრალურ აპარატში, ასევე შესაბამის საქვეუწყებო დაწესებულებებში გაეზრდებათ ხელფასი. 

 

იზრდება  სასკოლო ინფრასტრუქტურის განვითარების ბიუჯეტი. ტენდერი გამოცხადდა მე-18 და მე-14 სკოლის რეაბილიტაციაზე. 20 მილიონ ლარამდე ⁠იზრდება სპორტის სფეროს დაფინანსება.

 

დაგეგმილია ბიუჯეტის ზრდა როგორც ჯანდაცვის, ასევე სოციალური მიმართულებით. ჯანდაცვის მიმართულებით განხორციელდება ძვირადღირებული სამედიცინო მომსახურების დაფინანსების პროგრამები. გაგრძელდება სტიქიის შედეგად დაზარალებული ოჯახების მხარდაჭერა, დასაქმების ხელშეწყობა, პროფესიული გადამზადება.

 

ინვესტიციების მოზიდვა და ტურიზმის ხელშეწყობა ერთ-ერთ პრიორიტეტულ მიმართულებად რჩება. განახლებული  ბიუჯეტის ფარგლებში გაიზრდება  ტურიზმის დაფინანსება, შეიქმნება ახალი ტურისტული ინფრასტრუქტურა, დაგეგმილია კურორტ გოდერძიზე ახალი საბაგირო გზის მშენებლობა. შუახევში, ჭვანაში შესაბამისი ტურისტული ინფრასტრუქტურის მოწყობა. ჩირუხის ორზოლიან ზიპლაინთან მისასვლელი  გზის შესაბამისი ინფრასტრუქტურის მოწყობა. 

 

სოფლის მეურნეობის მიმართულებითაც იზრდება შესაბამისი საბიუჯეტო დაფინანსება. საოჯახო მეურნეობების განვითარების მიმართულებით წელს, უკვე 4000-ზე მეტმა ბენეფიციარმა ისარგებლა და აღნიშნული პროგრამა აქტიურად გაგრძელდება.